زمونږ تعلیم پرون او نن

د کال ۱۹۹۴ خبره به وي چې کله زما د تعلیم آغاز کېدو نو په یو داسې سکول کښې وشو چرته چې نه سکول وو او نه د سکول دپاره وداني ـ زمونږ د کلي یو قام پرسته انسان خپله حجره او د حجرې مخې ته یو چوپال د سکول لپاره وقف کړو زمونږ په سکول کښې یو استاذ وو چې نوم ئې فرمان علي وو خو نه پوهېږم چې اوس به چرته وي ځکه چې د کله نه زه په ښه او بد پوهه شوے یم نو بیا مې نه دے لیدلے ـ بیا چې کله وړومبي ټولګي ته شوم نو زمونږ دغه چوپال سکول هم ختم شو ځکه چې یوه ورځ باران زیات شوے وو او زمونږ د ناستې ځائے نه وو نو جومات ته لاړو ـ هلته زمونږ یو ملګري څه ګندګي خوره کړه نو مُلا صاحب د هغه ځائے نه زمونږ تورې تختې او ټاټونه بهر راوویشتل او مونږ د دغه چوپال سکول نه هم خلاص شو ـ نه پوهېږم چې ولې خو د هغه وخت نه دا مُلایان صاحبان زمونږ د شعور او پوهې د لارې د نیولو هڅې کوي خو ولې د خوش قسمتۍ خبره دا ده چې دوي پخپلو مقصدونو کښې کامیاب شوي نه دي ـ

نن ۲۰۱۴ء دے خو ولې يوه داسې واقعه درسره شریکووم چې ما ته ئې خپل د ۱۹۹۴ء سکول رایاد کړو ـ

هر چا به دا خبرې اورېدلي وي چې زمونږ ډېر قدرمند صوبائي حکومت د تعلیمي ایمرجنسۍ اعلان کړے دے او داخله مهم هم چلوي ـ کله عمران خان د وړو سره سکولونو کښې تصویرونه وباسي نو کله د ځان سره د کرکټ تکړه لوبغاړے شاهد افریدے هم راولي خو بیا هم نه پوهېږم چې مونږ تر اوسه پورې د تعلیمي نظام د کمزوریو او خرابو نه خبر نه شو او یا خو ترې ځان خبرول نه غواړو ـ

د مردان بخشالي پنډهېرو سیمه کښې یو داسې پرائمري سکول شته چې په کال ۱۹۸۰ء کښې جوړ کړے شوے دے ولې د ۲۴ کاله تېرېدو وروستو هم دغه سکول خپله وداني نه لري بلکې د کرائۍ په ودانۍ کښې ماشومان علم او پوهه حاصلوي ـ دا څه دومره لویه خبره نه ده ځکه چې د پوهې او علم لپاره نه خو د عمر قېد شته نه د ځائے خو ولې المیه دا ده چې د دغه ودانۍ د کرائۍ لپاره د ماشومانو نه لس لس روپۍ اخستلے شي ـ

دا هم څه دومره لویه خبره نه ده ځکه چې لس روپۍ نن سبا د یو ماشوم لپاره هم څه حېثیت نه لري خو ولې دا سکول په یوه داسې حلقه کښې جوړ دے چې د پښتونخوا د تعلیم صوبائي وزیر او د پاکستان تحریک انصاف مرکزي مشر محمدعاطف خان ترې د صوبائي اسمبلۍ نشست ګټلے دے ـ دا هم هغه وزیر دے چې د تعمیر سکول او تعلیمي ایمرجنسۍ چغې وهي بلکې په ټوله کابینه کښې هم دغه یو وزیر دے چې د اول نه تر اوسه پورې د خپل وزارت په څوکۍ قائم او دائم ناست دے ـ

د خېبر پښتونخوا صوبائي حکومت په تېر بجټ کښې د پرائمري تعلیم د ودې لپاره تقریباً ۳۴ ملینه روپۍ مختص کړې دي کومې چې د تېر کال په بجټ کښې تقریباً ۳۲ ملینه وې ـ ددې نه ورته ډېرې غېرسرکاري ادارې او تنظیمونه هم د تعلیم په مد کښې کارونه کوي او چې کله یوه ورځ زه بونېر ته تلے ووم نو هلته د آسټرېلین اېډ په مرسته سره د نرسري د ماشومانو لپاره په یو سرکاري پرائمري سکول کښې د نړیوال معیار کوټه جوړه کړے شوې  وه ـ

د دې دومره خبرو مقصد صرف او صرف دا وو چې که چرې د صوبائي وزیر په خپله حلقه کښې د خپلو سترګو لاندې دغه سکول داسې وران ویجاړ او بې حاله پروت دے نو د پښتونخوا د نورو سکولونو به څه حال وي ؟ ددې ځواب صرف او صرف زمونږ ګران وزیر محمدعاطف خان ورکولے شي ـ

په اخره کښې د تعلیم صوبائي وزیر محمدعاطف خان او د تعلیم صوبائي سیکتر افضل لطیف ته د بخشالي پنډهېرو د ماشومانو له خوا خواست کووم چې یواځې د بخشالي نه بلکې د ټولې صوبې د ماشومانو د مستقبل په اړه خپل نظر سنجیده وګرځوي ګنې هم دغه ماشومان به سبا د دوي په کرسو ناست وي او دوي به ورته ګوري ـ